ព្រះសីហនុ៖ អភិបាលខេត្តព្រះសីហនុ លោក គួច ចំរើន បានកោតសរសើរអ្នកឧកញ៉ា ម៉ុង ឫទ្ធី ដែលបានធ្វើការអភិវឌ្ឍលើវិស័យកសិឧស្សាហកម្ម និងបានជួយប្រជាពលរដ្ឋឱ្យមានការងារធ្វើនៅក្នុងស្រុកផ្ទាល់។ លោកយល់ថាទៅថ្ងៃខាងមុខតំបន់ឧស្សាហកម្មរបស់លោក ម៉ុង ឬទ្ធី និងក្លាយជាតំបន់ដែលមានសក្កានុពលទាំងការវិនិយោគ និងអភិវឌ្ឍន៍។

ថ្លែងក្នុងពេលចុះពិនិត្យការអភិវឌ្ឍន៍ក្នុងតំបន់កសិឧស្សាហកម្មដំណាំដូងប្រេង និងដំណាំកៅស៊ូរបស់លោក ម៉ុង ឬទ្ធី នៅក្នុងភូមិសាស្ត្រស្រុកស្ទឹងហាវ និងស្រុកព្រៃនប់ ខេត្តព្រះសីហនុ កាលពីថ្ងៃទី១៦ ខែមីនា ឆ្នាំ២០២២ លោក គួច ចំរើន បានថ្លែងថាការអភិវឌ្ឍលើវិស័យកសិឧស្សាហកម្មក្នុងតំបន់នេះ និងបានជួយប្រជាពលរដ្ឋឱ្យមានការងារធ្វើថែមទាំងបានជួយសាងសង់សាលារៀនសម្រាប់សិស្សានុសិស្សបានរៀនសូត្របង្កើនធនធានមនុស្ស និងធ្វើឱ្យជីវភាពគ្រួសាររបស់ពួកគាត់កាន់តែមានជីវភាពល្អប្រសើរ។ លោកសង្ឃឹម និងជឿជាក់ថា នៅពេលខាងមុខតំបន់នេះ នឹងក្លាយជាតំបន់ដែលមានសក្តានុពលលើការវិនិយោគ និងអាចទាក់ទាញអ្នកវិនិយោគមកបណ្តាក់ទុនលើគ្រប់វិស័យ។

ជាមួយគ្នានេះលោកអភិបាលខេត្តក៏បានអញ្ជើញចុះពិនិត្យសាលាបឋមសិក្សាឬទ្ធី៥ ស្ថិតនៅឃុំជើងគោ ស្រុកព្រៃនប់ ខេត្តព្រះសីហនុ និងបានចុះសួរសុខទុក្ខ ព្រមទាំងឈ្វេងយល់អំពីជីវភាពរស់នៅ របស់បងប្អូនប្រជាពលរដ្ឋ ដែលជាកម្មករ ក្នុងតំបន់អភិវឌ្ឍកសិឧស្សាហកម្ម ម៉ុង ឫទ្ធី ផងដែរ៕